GPSC Exam Postponed: ભારે વરસાદના કારણે GPSCની પ્રાથમિક પરીક્ષા મોકૂફ, 34 જાહેરાતો માટે યોજાવાની હતી કસોટી

ગુજરાતભરમાં મેઘરાજાએ રૌદ્ર સ્વરૂપ ધારણ કર્યું છે. રાજ્યના અનેક જિલ્લાઓમાં અવિરત અને ભારે વરસાદને કારણે જળબંબાકારની પરિસ્થિતિ સર્જાઈ છે. આ વરસાદી આફત વચ્ચે સામાન્ય જનજીવન ખોરવાયું છે અને તેની અસર શૈક્ષણિક તથા વહીવટી કાર્યો પર પણ પડી રહી છે. ગંભીર સ્થિતિ અને ઉમેદવારોના હિત તેમજ સુરક્ષાને ધ્યાનમાં રાખીને ગુજરાત જાહેર સેવા આયોગ (GPSC) દ્વારા મોટો નિર્ણય લેવામાં આવ્યો છે.

26 જુલાઈની પરીક્ષા મોકૂફ

રાજ્યમાં પ્રવર્તમાન ખરાબ હવામાન અને પૂર જેવી પરિસ્થિતિને પગલે આગામી 26 જુલાઈના રોજ યોજાનારી મહત્વપૂર્ણ પરીક્ષાઓ મોકૂફ રાખવામાં આવી છે. આયોગે સ્પષ્ટ કર્યું છે કે પ્રતિકૂળ હવામાન અને પરીક્ષાર્થીઓને અવરજવરમાં થનારી મુશ્કેલીઓ અને સુરક્ષાને ધ્યાનમાં રાખીને આ નિર્ણય લેવાયો છે.

34 વિવિધ જાહેરાતો માટે હતી પ્રાથમિક કસોટી

આ પરીક્ષા કુલ 34 જેટલી વિવિધ જાહેરાતો માટેની પ્રાથમિક કસોટી (Preliminary Test) તરીકે યોજાવાની હતી, જેમાં રાજ્યભરમાંથી હજારો ઉમેદવારો હાજર રહેવાના હતા.

નવી તારીખો અંગે સૂચના

વરસાદી સ્થિતિ સામાન્ય થયા બાદ આયોગ દ્વારા પરીક્ષાની નવી તારીખો (New Exam Dates) સત્તાવાર વેબસાઇટ પર જાહેર કરવામાં આવશે. ઉમેદવારોને નિયમિત રીતે સત્તાવાર વેબસાઇટ પર અપડેટ્સ જોતા રહેવાની સૂચના આપવામાં આવી છે.